Curso “Mitoloxía, crenzas, rituais e manifestacións festivas da cultura tradicional galega. Un achegamento antropolóxico ao patrimonio inmaterial de Galicia.

AÍNDA ESTADES A TEMPO DE MATRICULARVOS

Infórmanme na UNED que, como a docencia é online e os vídeos das clases están dispoñibles nun repositorio, aínda está aberto o prazo de matriculación do curso que estou impartindo sobre patrimonio inmaterial galego.

Así que se vos apetece achegarvos ao mundo da mitoloxía galega, das festas rituais, da etnomedicina, das xeografías míticas e sagradas ou da relixiosidade popular, entre outros moitos temas que trataremos, aínda estades a tempo de facelo a través deste curso de extensión universitaria que vai xa pola 4ª edición, aínda que este ano teña que ser online polo tema da Covid-19. O lado bo de ser online e gravado é que vos permite facer o curso dende casa e á hora e día que queirades. Así que estarei encantado de compartir esta actividade con vós. Aquí tendes o link para informarvos e demais.

Se o considerades oportuno, agradécese a difusión pois que siga sendo un éxito este curso axuda a que a UNED siga apostando e apoiando a tan necesaria formación en antropoloxía galega.

TODA A INFORMACIÓN DO CURSO NESTE LINK:

http://extension.uned.es/actividad/idactividad/22685?fbclid=IwAR3JiErYeO82QOfzE7WKguCX2b1s5eXoGttY22kCbtrXHY5YXJTSDislumQ

“Levar os vellos ao monte. El senicidio en la mitología gallega”.

Acaba de publicarse a Revista de Humanidades Liburna, da Universidad Católica de Valencia San Vicente Mártir. Neste no seu número 16–17 [Mayo–Noviembre, 2020] recóllese o meu traballo “Levar os vellos ao monte. El senicidio en la mitología gallega”. Un artigo de 67 páxinas onde fago unha análise antropolóxica sobre as posibles orixes e funcións do mito do abandono dos vellos no folclore galego.

Achego o PDF do artigo:

levar-os-vellos-ao-monte.-el-senicidio-en-la-mitologia-gallega.-rvta-liburnaDescarga\t

O documental “LUPA. NA PROCURA DO MITO DA RAÍÑA LOBA” on line

Aquí deixo a ligazón para o visionado do documental “Lupa. Na procura do mito da Raíña Loba”, que fixemos no 2018 dende Ab Origine.  Antropoloxía. Un proxecto audiovisual divulgativo entre o documental etnográfico e “aventura” que disfrutamos moito facendo e que agardo que vos guste.

SINOPSE:
“Lupa: Na procura do mito da Raíña Loba” é un proxecto audiovisual para a divulgación do noso patrimonio cultural. Unha aventura na que percorremos todo o país na procura dun dos mitos máis significativos da nosa cultura: o mito da raíña Lupa e da traslación do apóstolo Santiago. Unha viaxe fascinante polo noso patrimonio material e inmaterial, por montes sagrados, covas misteriosas, cidades asolagadas e moitas das paisaxes naturais e míticas que fan deste país unha auténtica xoia cultural.

FICHA ARTÍSTICA/TÉCNICA:
Título: Lupa. Na procura do mito da Raíña Loba.
Tipo: Documental etnográfico e histórico
Guión e Dirección: Rafael Quintía
Realización e edición: Miguel Alonso Cambrón
Produción: Ab Origine
Colaboran: Concello de Pontevedra, Concello de Boqueixón, Concello de Carnota, Cervexas Nasa, Vermú Petroni e Grupo Donoso
Ano: 2017
Duración: 73 minutos aprox.

VISIONADO ONLINE:

 

“ACHEGAS AO PATRIMONIO INMATERIAL GALEGO”

A Sociedade Antropolóxica Galega acaba de publicar un novo traballo que tiven o gusto de coordinar: “Achegas ao Patrimonio Inmaterial galego”. A presente obra conforma un libro coral que compendia nove traballos de diferente autoría, diversos en canto a temática, estilo e enfoque pero que comparten todos eles o denominador común de tratar temas do noso Patrimonio Inmaterial. Áreas de coñecemento que van dende a mitoloxía, ata a relixiosidade popular pasando polas festas tradicionais, as crenzas ou os ritos aínda vivos na cultura tradicional.

Este libro nace ao abeiro do curso “Mitoloxía, crenzas, rituais e manifestacións festivas da cultura tradicional galega. Un achegamento antropolóxico ao patrimonio inmaterial de Galicia“, curso de extensión universitaria que deseñei e inmpartín na UNED neste curso académico. Xa que logo o libro que contén unha escolma de traballos de investigación ao redor do Patrimonio Inmaterial galego feitos por un entusiasta grupo de alumnos e alumnas que aceptaron a miña proposta de facer unha investigación antropolóxica e despois reflectir os resultados nun traballo de divulgación.

Dende aquí transmito os meus parabéns a Sara Alonso Mallo, Lina Álvarez Iglesias, Carlos X. Ares Pérez, Víctor Caride Abalde, Ana Durán Penabad, Pilar López Vilas,  Lidia Mariño Ventoso, Natividad Rey Ordóñez e Cruz Vázquez Torres polo traballo feito e pola entrega neste proxecto.

Características técnicas:

Coordinador: Rafael Quintía Pereira
Autores/as: Sara Alonso Mallo, Lina Álvarez Iglesias, Carlos X. Ares Pérez, Víctor Caride Abalde, Ana Durán Penabad, Pilar López Vilas,  Lidia Mariño Ventoso, Natividad Rey Ordóñez e Cruz Vázquez Torres.
Editorial: Sociedade Antropolóxica Galega
Impresión: Branco e negro
Tamaño:23×16
202 páxinas
Ano: 2018
I.S.B.N.: 978- 84-948682-1-4
PVP: 15€

ESTREA DO DOCUMENTAL “LUPA. NA PROCURA DO MITO DA RAÍÑA LOBA”

O vindeiro venres 16 de marzo ás 21h estrearemos no Teatro Principal de Pontevedra o noso documental “Lupa. Na procura do mito da Raíña Loba”. Un audiovisual de AB ORIGINE con dirección e guión de Rafael Quintía, narración e presentación de Rodrigo Cota e realización e montaxe de Miguel Alonso. Neste novo traballo percorremos a xeografía galega na procura da pegada da Raíña Lupa, dende os relatos contidos no Codex Calixtinus ata as lendas de tradición oral que aínda permanecen vivas en moitos recunchos do país. Unha aventura que nos gustaría compartir con todos vós.

Trailer