PRESENTACIÓN DO LIBRO “ALICORNIO” EN SANDIÁS

Este sábado 30 presentarémo-lo libro “Alicornio” no local A Corte dos Bois en Sandías, Ourense. O acto enmárcase dentro das actividades do Roteiro Cultural por Ourense, organizado polo blog Desperta do Teu Sono (DTS). Aquí ténde-lo programa de actividades dese día. Se estades interesados en participar só tendes que poñervos en contacto co DTS.

PROGRAMA:

11:00 Combinamos todos na Praça Maior, Praça do Concelho ou Praça do Campo.
11:15 Visita às Burgas, termas e ao centro de interpretação.
11:30 Santa Maria Madre (primeira catedral de Ourense) e Praça da Madalena.
12:00 Visita à Sé. Catedral de Ourense. Capela do Santo Cristo.
12:30 Visita à zona velha de Ourense.
(Ruas dos vinhos, Praça do Ferro, Santa Eufémia, Eirozinho dos Cavalheiros…)
13:30 Comida num restaurante da zona dos vinhos da cidade
16:00 Visita à Ponte Romana.
17:00 Visita às termas (ou Chavasqueira, ou Outariz ou Moinho da Veiga)
18:00 Saída para “A Corte dos Bois” em Sandiães
19:00 Apresentação do livro de Rafa Quintia “O alicórnio. O poder do corno de unicórnio na medicina tradicional galega”
20:00: Magusto na “Corte dos Bois” de Sandiães com churrasco, frango, chouriço, vinho, sidra, cerveja e castanhas. (12 Euros)
Atuação do grupo de música tradicional galega da SAGA (Sociedade Galega de Antropologia)
22:00 (aproximadas): Banho nas termas de águas quentes (optativo)

LIGAZÓN:

http://despertadoteusono.blogspot.com.es/2013/11/roteiro-por-ourense-segunda-edicao.html

ZAPATITOS DE CHAROL

Hoxe, 25 de novembro, Día Mundial Contra a Violencia de Xénero deixo aquí o meu modesto homenaxe tirado do meu poemario  “Á sombra de Bouza Panda. Poemario de trincheira e maldizer”.

     

       “Zapatitos de charol”

Entrou no coche,

como tantas veces ó día.

Naquel coche

que sempre é o mesmo

aínda que o conduzan

homes distintos.

 

Pararon naquel camiño sen saída,

naquel edén decadente e improvisado.

Nun xardín sementado de clinex

e preservativos queimados polo sol.

 

Non era o que sempre soñara

pero era un traballo.

Ninguén soña con iso,

ninguén di: “mamá

de maior quero ser puta”.

 

Pero ás veces

a vida non pregunta,

non dá opción

e un acaba nun camiño sen saída

e nunha vida sen rumbo.

 

Sentiu o peso daquel home sen rostro,

e puido uli-lo seu cánido alento,

mentres sufría a luxuriosa cadencia

das súas arremetidas salvaxes.

 

Observou o seu rostro reflectido

no espelliño do parasol e lembrouse

daquel tempo en que foi feliz.

Daquel tempo da súa infancia

cando era tan só unha nena.

 

Aquela nena que sempre estreaba

zapatitos de charol

o Día da Palma.

CONFERENCIA NA UNIVERSIDADE DE DEUSTO: “O MUNDO DA MORTE, OS DEFUNTOS E AS ÁNIMAS NA CULTURA GALEGA”

Este mércores 27 de novembro ás 19.30h impartirei unha coneferencia na Sala Garate do Campus de Bilbao da Universidade de Deusto. É para min un auténtico pracer e un honor poder ir a Euskadi a falar dun aspecto tan fascinante da nosa cultura. O meu agradecemento a Paulo O´Lema, da  Cátedra de Estudos Galegos da Universidade de Deusto, por terme convidado. O xoves 28 repetiremos conferencia en Vitoria. Se a alguén lle queda de paso e ten ganas, alí nos vemos.

PRESENTACIÓN DO LIBRO “ALICORNIO” EN LUGO

O venres 22 de novembro ás 21h no local da A.C. O Carneiro Alado de Lugo presentarémo-lo meu último traballo “Alicornio. O corno de unicornio na medicina tradicional galega“. No acto estarei acompañado do compañeiro e Secretario da SAGA Miguel Losada e do ben querido e admirado Antonio Reigosa, quen ademais tivo a xenerosidade de facé-lo prólogo do libro “Alicornio”.

COS RAPACES DISCAPACITADOS DE “JUAN XXIII” DE ROTEIRO CULTURAL POR SALCEDO

Este pasado sábado 16 tiven o pracer de guiar nun roteiro cultural por Salcedo os rapaces do centro de formación de persoas con discapacidade intelectual Juan XXIII de Pontevedra. Ó grupo de rapaces e monitores tamén se lle uniron outras persoas que se interesaron nesta andaina enmarcada dentro dos actos da II Xornadas de Pinchos e Tapas que a Sociedade Deportiva e Cultural Salcedo organiza dende o ano 2012 para recaudar fondos para as súas actividades.

É moi gratificante para un ve-lo interese e entusiasmo que poñen os rapaces de Juan XXIII en tódalas actividades que fan.  Foi un auténtico pracer gozar da súa receptividade cara as historias e lendas que lle puiden contar ó longo do percorrido. Os meus parabéns para os monitores e esperemos poder seguir facendo cousas xuntos.

  O grupo de participantes no adro da igrexa de San Martiño de Salcedo, onde se garda en cogre de chumbo o corazón do arcebispo Malvar.

PERCORRIDO:

Comezamos a nosa andaina na igrexa de San Martiño, templo parroquial onde, entre outras curiosidades que contaremos, se garda o corazón do arcebispo Malvar. Baixamos por diante do cemiterio, deixamos atrás a antiga casa da Sociedade de Agricultores e nos diriximos ao lugar do Cruceiro, onde poderemos contemplar dous exemplos dos numerosos cruceiros que existen na parroquia de Salcedo.

No pazo de Boullosa ou dos Miradores

Dende aquí iremos cara a O Carramal onde nos achegaremos ata o pazo dos Miradores (Granxa de Boullosa) para contemplar esta magnífica mostra de arquitectura solariega galega e refrescarnos na súa fonte de augas puras.

No castro do Monte das Croas, explicando o castro e contando a mítica lenda da moura do monte das Croas.

Encarreiramos, a continuación, os nosos pasos cara a Birrete para parar no Monte das Croas, un dos castros máis importantes do concello de Pontevedra. Visitarase este xacemento arqueolóxico e, unha vez explicada a súa importancia e narrada algunha das lendas que atesoura, tomaremos o sendeiro que discorre paralelo ao río Batán ata chegar a autoestrada AP9.

Un pouco de etnografía nos muíños do Batán, en pleno proceso de restauración e posta en valor.

Neste fermoso treito de río poderemos visitar catro muíños de grande valor etnográfico, un manancial de augas curativas e coñecer algunha das historias e contos que teñen por escenario este frondoso paraxe.

A carón do olleiro de augas curativas do muíño da Xila.

Unha vez chegado á pista e servizo da autoestrada dirixirémonos primeiramente cara á Cancela para tomar despois o camiño que vai ás Veigas do Río, outro dos lugares vinculados á mitoloxía da parroquia.

Nas Veigas do río, couto de caza do temido Rachador e morada de serpes xigantescas.

Dende aquí continuamos pola pista que conduce ata a parte baixa do lugar do Carramal para saír na estrada que baixa ata a Misión Biolóxica. No lugar da Carballeira tomaremos o vello camiño do cemiterio, deixando á nosa dereita o Pazo de Gandarón (hoxe Misión Biolóxica de Galicia), ata chegar ao cruceiro de Tarabelo.

Collemos agora a man dereita cara ao lugar de  Cabanas, pasando polo edificio que ía ser casa do antigo concello de Salcedo e facendo un alto nos petróglifos de Pozo da Escribana, boa mostra do valioso arte rupestre da parroquia.

Bordeando o Monte do Castro chegaremos ata o pavillón de Cabanas onde daremos por finalizado o noso percorrido.

Parte do grupo ó final do percorrido no monte do Castro de Cabanas.

ORGANIZA: S.C.D. SALCEDO

 GUÍA: Rafael Quintía Pereira

Lugar de saída: Igrexa de Salcedo

Lugar de chegada: Pavillón de Cabanas

Hora de saída: 10h

Duración: 2 horas e media