Monthly Archives: Maio 2013
SÁLVASE DA DESTRUCCIÓN O TÚMULO DE COESES
Hai uns meses denunciabamos dende este blog a case inminente destrución dun posible e inédito túmulo atopado no 2011 co gallo das obras da autoestrada A-54 ó seu paso pola localidade lucense de Coeses. O xacemento en cuestión é unha sorte de túmulo e anel lítico duns 60 metros de diámetro con foxo arredor e muros interiores e exteriores. No seu momento (véxase o post: https://asombradebouzapanda.wordpress.com/2013/02/07/fomento-quere-destruir-un-posible-tumulo-inedito-en-galicia/ eu adiantaba a hipótese de que poidésemos estar ante unha importante construción tumular semellante ós que se atopan en Gran Bretaña e Irlanda, moitos deles interesantísmos lugares de prácticas rituais ou relixiosas asemade de monumentos funerarios.
Xunto ó túmulo británico coñecido como West Kennet long barrow
Círculo lítico Druids Circle, Gales
Durante este tempo transcurrido, dende que en febreiro se denunciaron os feitos, moitas foron as persoas e moitos os colectivos e medios de comunicación que se puxeron en contacto conmigo para interesarse polo tema e ofrecerse a colaborar no que fose necesario para poder salvar este importante xacemento, a todolos o meu agradecemento. Entre estas persoas quero destacar a Pablo Núñez (Secretario de Cultura do PSdeG-PSOE en Lugo) que, a través do seu grupo parlamentario, tivo a ben facer unha pregunta parlamentaria ó respecto do xacemento de Coeses, solicitando a súa protección e estudo. Adxunto a continuación o documento da pregunta realizada no parlamento galego e a contestación dada pola Xunta de Galicia amosando a súa vontade de estuda-lo tema.
5.4.13 respuestas hallazgos coeses
No execelente blog do amigo Xabier Moure (http://onosopatrimonio.blogspot.com.es/2011/07/ultimas-achegas.html) pódese ler unha detallada crónica do acontencido nestes catro meses co xacemento de Coeses e a repercusión mediática, institucional e social que tiveron as nosas denuncias do que parecía un novo e inevitable atentado contra o noso patrimonio.
Semella que por unha vez a presión social e a repercusión mediática fixo o seu efecto e o valioso xacemento vai ser estudado e conservado, xa que Fomento vai desvia-lo trazado da autoestrada para non destrui-lo xacemento arqueolóxico. Agardemos tamén que os resultados desas invstigacións se fagan públicos como corresponde a todo aquelo que se paga cos cartos de todos, pero iso é outra loita.
Coido que este suceso ten que facernos pensar tamén na forza das redes socias e a súa utilidade cívica cando se lles dá un bo uso, e tamén debería facer reflexionar a certas autoridades sobre onde se coce realmente hoxe en día a “información”, onde latexa unha parte importante do que os sociólogos chaman pulso social e a repercusión que as canles de comunicación virtuais e alternativos. como os blogs e as redes sociais, poden ter á hora de divulgar, concienciar e/ou denunciar feitos que moitas veces se lles escapan, ou non lle interesen, ós medios convencionais de comunicacións e ós aparatos de propaganda das respectivas administracións.
Así que, como ven, hoxe podemos congratularnos de que o túmulo de Coeses se vai salvar da destrucción. Unha pequena victoria nunha batalla desta grande guerra salvaxe contra todo o que configura a nosa identidade como pobo. Eu, dende este humilde blog e atendendo a quen conmigo quixo falar, fixen o que puiden por que se coñecese a importancia deste xacemento e o interese do seu estudo e conservación. Algo que tamén fixeron moitos outros compañeiros que denunciaron os feitos e se interesaron polo tema, así que o meu tan só foi un pequeno gran de area nunha loita titánica e diaria contra a destrucción sistemática do noso patrimonio, pero nada de todo isto se tería conseguido sen o impagable labor do amigo Xabier Moure que sacou tempo do seu tempo para atende-los medios de comunicación, para guialos ó lugar do achádego e para numerosas reunións mantidas con autoridades e diversos colectivos culturais, sociais e políticos da zona nun intento de informar e concienciar a prol da conservación deste xacemento. Vaia dende aquí o meu público recoñecemento a Xabier e para todas aquelas persoas que loitan polo noso patrimonio e pola nos cultura en todo o país.
Túmulo de Wayland´s Smithy long barrow, Inglaterra
Tódolos post publicados neste blog sobre este asunto:
NOVO ROTEIRO NO “ESPAZO DOS SETE CAMIÑOS” CO COLEXIO DE AVOGADOS DE PONTEVEDRA
O pasado sábado 25 de maio organizamos un novo roteiro do Espazo natural e arqueolóxico dos Sete Camiños. Neste ocasión tiven o pracer de guia-lo membros do grupo de sendeirismo do Ilustre Colexio de Avogados de Pontevedra, que amosaron os seu interese por coñece-lo patrimonio natural, arqueolóxico e etnográfico que atesoura este valioso espazo dos montes do Morrazo. No roteiro acompañáronme tamén o comnpañeiro da SAGA João Bieites e Fran, colega da Comisión Técnica para a creación do Espazo natural e arqueolóxico dos Sete Camiños.
No cruzamento dos Sete Camiños
No nacemento da Fonte da Prata
Nos petróglifos do Outeiro das Mouras
Camiño do miradoiro do Monte Pornedo
DESCARGA O Nº1 DE “FOL DE VELENO”. Ano 2010
Para celebra-lo Día das Letras Galegas, aquí vos deixo para lectura on line ou descarga libre o Nº1 de “Fol De Veleno”. Este número, editado no 2010 polo Grupo de Estudos Etnográficos Serpe Bichoca, publicouse baixo o formato de revista de etnografía e historia. Co tempo, e baixo o amparo da Sociedade Antropolóxica Galega, esta revista de etnografía acabaría convertida no actual “Fol de Veleno. Anuario de Antropoloxía e Historia de Galiza”.
CRÓNICA DAS “II JORNADAS DAS LETRAS GALEGO-PORTUGUESAS”
Este pasado domingo 12 de maio na aldea portuguesa de Pitões das Júnias, nunha paisaxe espectacular e rodeados das impresionantes montañas do Gerês-Xurés, remataron as II Jornadas das letras galego-portuguesas con grande éxito de participación.
Unha fin de semana intensa onde tivemos tempo, non só para degusta-la marabillosa cociña barrosana, senón tamén para conversar, intercambiar opinións, gozar da poesía e facer novos amigos.
Xantar de convivencia e benvida do Padre Fontes (foto: José Goris)
Con António Alijó e Santiago Bermúdez
Un pracer poder compartir palestras con Santiago Bernárdez, Miguel Losada, António Alijó e un luxo poder pasar estes días co sabio e ben querido Padre Fontes e poder gozar da actuación sentida e entregada do Bruxo Queiman.
Un momento estelar da actuación do Bruxo Queiman co Padre Fontes de fondo esconxurando ás forzas malignas
Foi para min un honor poder participar nesta edición dunhas xornadas que estou certo cada ano se irán consolidando máis e máis ata ser un referente fundamental no calendario cultural non só do Barroso senón de ámbalas beiras administrativas da Gallaecia. Un acto de irmandade cultural e poética de pobos que son fillos dunha mesma nai.
Intervención da escritora portuguesa Clara Pinto Correia
O meu agradecemento ós organizadores por ter pensado en min para dar unha conferencia nestes xornadas e polo seu afecto e amabilidade. Moito obrigado a José Barbosa e a Carolina Horstmann e parabéns polo seu traballo.
Participantes das xornadas na visita ó mosteiro de Pitões (foto: José Goris)
PARTICIPAMOS NAS “II JORNADAS DAS LETRAS GALEGO-PORTUGUESAS”
A fin de semana do 11 ó 12 de maio terei o pracer de participar nas “II Jornadas das letras galego-portuguesas” que se celebran na vila portuguesa de Pitões das Júnias. Agardo que o meu relatorio: “Xeografias míticas da Galiza e espazos hierofânicos.” sexa do interese de tódolos asistentes. Tan só me queda darlle os parabéns ós organizadores por este interesante evento.
PROGRAMA:
Dia 11 de Maio Sábado (Hora portuguesa)
- 12:00: Juntança de irmandade, convívio e jantar na casa de Turismo Rural do Padre Fontes Nossa Senhora dos Remédios em Mourilhe.
- 16:00: Apresentação em Pitões das II Jornadas das Letras galego-portuguesas. Temática: “Lugares mágicos da Gallaecia”.
- 16:30: Recital de Poesia
- 17:30: 1ª Palestra:: António Alijó: “Árvores e pedras mágicas do mundo celta.”
- 18:30: 2ª Palestra: Rafael Quintia “Geografias míticas da Galiza e espaços hierofânicos. Mitos, rito e crença”
- 19:30: Visita turística pela aldeia de Pitões
- 20:30: Ceia-Convívio na Taberna Celta
- 22:00: Atuação do Bruxo Queimam
Dia 12 de Maio Domingo (Hora portuguesa)
- 10:00: 3ª Palestra: Santiago Bernardez: “Os “Annála Ríoghachta Éireann” e as relações entre a Galiza e Éire na Idade Moderna”
- 11:00: 4ª Palestra: Miguel Losada: “Os que termam do céu. Imagens da Sacralidade antiga ou quando o mundo era um templo.”
- 12:00: Conclusões e encerramento.
- 14:00: Comida num restaurante da aldeia
- 16:00: Roteiro e explicação pelos exteriores de Pitões