PRESENTACIÓN EN MARÍN DO MEU LIBRO “ANÁLISE ESTRUTURAL E SIMBÓLICA DO MITO DA MOURA”

Este venres 18 ás 20h estaremos no Museo Manuel Torres de Marín presentando o meu traballo “Análise estrutural  e simbólica do mito da Moura”. O meu agradecemento aos amigos de Queremos Galego Marín por terme convidado a este acto. Alí nos vemos.

 

ACTUALIZACIÓN DO POST: IMAXES DO ACTO

Fotografías cortesía das A. C. Queremos Galego Marín.

“MEU PONTEVEDRA”, CASTELAO VOLTA A SALCEDO

Unha experiencia única para non perderse e que teño o gusto de guiar. Damos vida a Castelao, e da súa man e da de diferentes personaxes que irán saíndo ao noso encontro percorremos a historia e o patrimonio das parroquias de Campolongo e de Salcedo rememorando aqueles paseos que o ilustre Castelao daba pola parroquia de San Martiño e o monte de Matalobos.

Un roteiro didáctico coordinado por A Citania Arqueoloxía e teatralizado pola compañía de teatro Escuadra 17. Unha actividde do programa Ano Castelao, organizada pola asociación de veciño Salcedo Norte coa colaboración da Deputación de Pontevedra e da Comunidade de Montes de Salcedo.

Se queredes coñecer dun xeito diferente algún dos episodios máis importantes da nosa historia acontecidos nos últimos 200 anos, se queredes descubrir o patrimonio inmaterial, arqueolóxico e artístico de Salcedo e ter a oportunidade de falar e pasear ao abeiro da lembranza de Castelao esta é a vosa oportunidade.

SÁBADO 12 DE NOVEMBRO E DOMINGO 20 DE NOVEMBRO.

 

 

CRÓNICA DAS “I XORNADAS SOBRE ANTROPOLOXÍA” DA SAGA

Remataron as I Xornadas sobre Antropoloxía organizadas pola Sociedade Antropolóxica Galega coa colaboración do Concello de Pontevedra (concellería de Cultura) e non podemos estar máis satisfeitos. Uns conferenciantes de luxo, un programa que espertou moito interese e unha afluencia de público máis que xenerosa. O balance foi moi positivo e anímanos a seguir traballando nesta liña para que o vindeiro ano estas xornadas teñan a continuidade que se merecen e demanda toda a xente interesada na antropoloxía.

Dous días de cine etnográfico, dous días de conferencias e como colofón das xornadas o domingo a visita guiada aos petróglifos de Tourón a cargo de Buenaventura Aparicio Casado,

a quen aproveitamos no día de clausura para facer Socio Honorífico da SAGA en recoñecemento a todo o seu traballo a prol da instigación e da divulgación da Antropoloxía e a historia de Galicia.

Puidemos gozar do marabilloso documentario “Em companhia da morte” e debater cos seus autores Vanesa Vilaverde, Eduardo Sanches e João Varela.

Desfrutamos tamén do documentario “Terra das marabillas” no que tiven a  sorte de traballar con Ana Lois.

Coñecemos tamén o proxecto audiovisual sobre medicina galega “Palabras secretas” da xornalista Ana Lois, que por motivos de forza maior non puido estar presente.

Félix Castro achegouno ao mundo dos encantos, grimorios e ciprianillos.

Buenaventura Aparicio ilustrounos sobre a pegada que os canteiros e os cazatesouros deixaron nos nosos petróglifos.

O antropólogo Carlos Víctor Rodríguez descubriunos o mundo dos tarahumaras de México.

E Marcial Gondar deunos unha lección maxistral sobre a norte en Galicia.

Finalizamos as xornadas viaxando ás estepas e á tundra de Siberia da man da antropóloga toledana e experta en pobos siberianos Carmen Arnau Muro.

Todo un luxo de semana e unha ocasión marabillosa para aprender moitas cousas e intercambiar opinión e debater con todos os amigos que se achegaron a este evento.

O noso agradecemento a todos os que participaron nestas xornadas e a todo o público que durante todos os días encheu a sala da Casa da Luz de Pontevedra. Moitas grazas tamén á concelleira de cultura do concello de Pontevedra Anxos Riveiro polo seu apoio e ao alcalde de Ponte Caldelas André Díaz por facilitarnos a visita ao centro de interpretación do Parque Arqueolóxico de Tourón. Vémonos para o vindeiro ano falando das cousas das que nos gustan falar e das que tanta falta fai que se fale.