PRESENTACIÓN EN RAMIRÁS DO LIBRO “UNIVERSOS SIMBÓLICOS”

Este sábado 20 de xaneiro ás 17.30h estarei en Ramirás (parroquia de Casardeita) convidado pola Asociación Cultural Follas Vivas-Lois Antón de Casardeita  para presentar o meu novo libro “Universos simbólicos. Olladas ao redor da cultura e identidade galega“. Moi agradecido por terme convidado a este acto e será un pracer compartir este tempo con quen teña a ben achegarse ao local social de Casardeita.

 

26230329_520351435031215_2979745394121675030_n

Advertisements

PRESENTACIÓN EN PONTEVEDRA DO LIBRO “UNIVERSOS SIMBÓLICOS”

Chegou o día de presentar o meu novo libro na Boa Vila de Pontevedra. A cita será o vindeiro martes 16 de xaneiro ás 20h na Casa das Campás. E non o podía facer en mellor compaña pois, desta vez, acompáñame como mestre de ceremonias o meu amigo e escritor Rodirgo Cota. Se non tendes plan mellor para ese día e queredes pasar un anaco xuntos falando dalgunhas desas cousas da cultura que nos fan como somos, estarei encantado de vervos a todos e a todas alí. Convidados quedan, pois.

cartaz_rafa_universos

 

NOVO CURSO DE ANTROPOLOXÍA GALEGA NA UNED

Tras o éxito de estudantes matriculados no curso Mitoloxía, crenzas, rituais e manifestacións festivas da cultura tradicional galega que impartín na UNED o trimestre pasado e ante a demanda e interese suscitado, teño o pracer de anunciar un novo curso de extensión universitaria para este semestre: “Curso de Antropoloxía social e cultural de Galicia: etnografía, patrimonio inmaterial e etnoarqueoloxía. Unha viaxe antropolóxica pola cultura e sociedade tradicional galega“.

A partir do 15 de febreiro e ata o 31 de maio temos unha cita coa antropoloxía galega na sede de Pontevedra da UNED.  Se estades interesados neste campo do coñecemento sobre o que somos e por qué somos como somos podedes matricularvos online a través da web da UNED.

Se neste curso desfrutamos todos xuntos aínda que só sexa a metade do gozado no anterior ben merece a pena.

Aquí a ligazón ao curso con toda a información de contidos e horarios:

http://extension.uned.es/actividad/16191&codigo=CURSO

PUBLÍCASE “UNIVERSOS SIMBÓLICOS. OLLADAS AO REDOR DA CULTURA E DA IDENTIDADE GALEGA”.

portada universos

Para rematar o ano coa forza coa que o empezamos, velaquí o meu último e derradeiro libro do 2017: “Universos simbólicos”.  Un compendio de textos cuxa temática xira en torno a diferentes aspectos da cultura galega e, xa que logo, dos diferentes elementos constituíntes da nosa identidade como pobo. Nas páxinas deste libro intento achegar ao lector a cuestións que teñen que ver coas ideas máxico-relixiosas da cultura galega; percorremos, entre outros, aspectos da nosa mitoloxía, do simbolismo, das nosas crenzas máis íntimas, dos nosos medos, do papel da lingua nunha cultura, ou intento responder, por exemplo, a cuestións tan tópicas como a de por que os galegos responden cunha pregunta, sen deixar atrás temas relacionados co noso entramado social. En definitiva, unha ampla e holística ollada a algunhas das moitas caras que presenta a cultura galega.

Quero amosar o meu agradecemento ao amigo e colega o antropólogo José Luis Cardero por ter feito un magnífico prologo que, sen dúbida, engalana este traballo.

A partir deste venres 22 de decembro o libro estará dispoñible nas librerías de Pontevedra, e pouco a pouco en librerías das catro provincias do país. Se alguén está interesado tamén pode pedir o libro por correo contactando coa editorial AB ORIGINE Edicións no seu email  info@aborigine.es.

Datos técnicos:
Autor: Rafael Quintía
Editorial: AB ORIGINE Edicións
Impresión: branco e negro
Tamaño: 23×16
326 páxinas
Ano: 2017
I.S.B.N. 978-84-947844-0-8
PVP: 18 €

PRESENTACIÓN EN PONTEVEDRA DE “A LINGUAXE DAS CAMPÁS”

Este martes 12 de decembro ás 20.30h na Casa das Campás de Pontevedra presentaremos o noso novo libro “A Linguaxe das campás. Etnografía dos sinos”. O traballo inclúe un DVD con audios de Xoán Xil (toques de campás) e vídeos de Rosa Lede (crónicas das xornadas de campaneiros 2007-2016).  Alí nos vemos.

PRESENTACION CAMPAS

%d bloggers like this: